Politur news

Politur news (5)

Awe mainta a inisia na WTC (World Trade Centre Curaçao) e programa di training ku instruktornan di Miami Police Department ta duna na polisnan lokal. Un kantidat hopi grandi di miembronan di kuerpo polisial di Kὸrsou, inklusive di Politur i di ‘Bike Team’ ta partisipando na e training aki ku ta dura te ku Djamars 30 di September prὸksimo.

Apertura di e training awe mainta tabata na enkargo di Minister di Hustisia di Kὸrsou, mr. Nelson Navarro kende a mustra riba e importansha pa riba un base kontinuo sigui hañá training i sigui desaroya, algu ku ta na benefisio di e propio agentenan, pero naturalmente tambe na benefisio di Kὸrsou. Instruktornan di Miami Police Department enkargá ku e trainingnan ta Major Jose Perez, Sargento Antonio Regueira i Ofishal Francisco Liranzo. Tópikonan ku ta keda trata durante di e trainingnan ta entre otro: - investigashon kriminal, investigashon di homisidio, investigashonnan interno, asuntunan táktiko i estratégiko, servisio na turista, etsetera. Tambe ta bai tin ‘field training’, komo parti di e seshonnan.

E trainingnan aki a bira posibel danki na un koperashon estrecho entre WTC representá pa su direktor Sr. Carmelo Stefano, Sr. Humphrey Josefa MBA Presidente di Politur Kὸrsou i Jefatura di kuerpo polisial di Miami; tur e proseso aki a keda stimulá pa Minister di Hustisia di Kὸrsou, Mr. Nelson Navarro. Ta e intenshon pa Politur sigui ku e inisiativanan aki na bienestar di nos komunidat. Riba e kombinashon di foto athuntu un bista di inisio di e training  i e instruktornan.

Djaluna 27 di Oktober ultimo, Minister di Hustisia di Kὸrsou, Mr. Nelson Navarro a realisá un bishita di trabou na e siudat di Miami/Florida. Meta di e bishita aki tabata pa reuní ku e Alkalde di siudat di Miami Sr. Tomás Regalado. E reunion aki a sirbí pa estrecha e lasonan di koperashon eksistente entre Miami Police Department i Kòrsou. Ademas Minister di Hustisia Sr. Nelson Navarro a reuni ku e alto ehekutivo polisial, Hefe interino di Miami Police Department Sr. Jorge Gomez, remplasando Chief of Police Sr. Manuel Orosa ku ta di vakashon.

Manera ta ampliamente konosí, resientemente tabata na Kòrsou un delegashon di Miami Police Department riba invitashon di Politur di Kòrsou. Na e okashon aki tres (3) di e ekspertonan di Miami Police Department a duna training na tantu agentenan di Politur i di kuerpo polisial di Kòrsou. No menos ku 100 agente polisial durante un siman largu a sigui e trainingnan korespondiente na WTC. Durante di su bishita na Miami, Minister Navarro tabata akompañá pa e Hefe interino di kuerpo polisial di Kòrsou, Sr. Jules Ilario i di e Presidente di Politur Sr. Humphrey Josefa.

Alkalde di Miami Sr. Tomás Regalado a hasi uso di e oportunidat ku Minister Navarro tabata di bishita serka dje, pa entregele e yabi di e siudat di Miami. E Alkalde a konfirmá ku Miami Police Department den futuro ta sigui duna tur koperashon na Politur i  kuerpo polisial di Kὸrsou.  E gesto aki a keda hopi apresia pa e titular di hustisia di Kòrsou. E kombinashon di foto ta ilustrá e bishita na Miami Police Department i serka e alkalde di e siudat di Miami.

Na e okashon spesial aki tabata presente Ministro di Hustisia mr. Nelson Navarro i Ministro di Asuntunan Ekonómiko i di  Turismo Sr. Stanley Palm. Tabata ku koperashon di e kompañianan CPA/KTK i Curinde, ku ta resortá bou di e kartera di Minister Palm, ku Politur por a kumpra e quadnan aki.

E kompañia serka kua Politur a kumpra e quadnan ta Curaçao Buggy Adventures. Tarea di e quadnan (vehíkulonan pa tereno difisíl) ta pa garantisá seguridat i protekshon na turistanan ku ta di bishita nos isla.

P’esei mes nan lo ta den operashon den areanan manera Westpunt i bisendario tambe. Ta bon pa menshoná pa esnan ku ainda no sa, ku Politur su ofisina den e warda di polis na Westpunt ta operashonal pa algun tempu kaba i ku e ta alkansabel bou di e numbernan di teléfon: 864-0000 i 864-0001. Politur ta sigui hasi esfuerso pa dispone di sufisiente ekipo, esaki di moda ku e agentenan polisial ku ta traha pa Politur tin e hermèntnan necesario pa por kumplí ku nan tarea kabalmente. Ta di spera ku sektor priva, mas en partikular e sektor hotelero i di gastronomía ku mas ta disfrutá di e protekshon ku Politur ta brindanan i nan huespetnan, kuminsa koperá di forma real ku Politur.

Pasombra Turismo ta importante pa hinter Kὸrsou i ta nos tur konhuntamente mester koperá ku n’e, sirbiële i protehé.

Thursday, 11 September 2014 00:00

Presidente di Fundashon Politur Kὸrsou (Polis di Turismo), Sr. Humphrey Josefa resientemente tabata na Miami/USA, unda e’la hiba kombersashonnan masha fruktifero ku alto ehekutivonan di Miami Police Department. Meta di e reunionnan aki tabata pa duna oido na e disponibilidat ekspresa pa Miami Police Department pa kopera ku Politur Kὸrsou.

Komo resultado direkto di esaki, un delegashon di Miami Police Department lo ta na Kὸrsou di 25 pa 30 di Septḕmbḕr prὸksimo pa duna training na tantu agentenan di Politur i otro miembronan di kuerpo Polisial di Kὸrsou.

E trainingnan korespondiente tin un karakter tantu teorίko i praktiko.

Segun e fecha di inisio di e trainingnan ta aserka, mas detayes korespondiente ta keda suministra.

Riba e kombinashon di foto athuntu ta bisto Presidente di Politur Kὸrsou Sr. Humphrey Josefa den kompaᾖia di Sr. Manuel Orosa kende ta e hefe mᾴksimo di Polis di Miami i tambe un foto di grupo ku d.r.p.d. Sr. Carmelo de Stefano di WTC (World Trade Centre Kὸrsou), Major Perez direktor di e sentro di training di Miami Police Department, Sr. Humphrey Josefa di Politur Kὸrsou i Sr. Manuel Orosa, ehekutivo prinsipal di Miami Police Department.

Politur Kὸrsou, ta sigui ku su esfuersonan pa será aliansa ku otro paisnan, p’asina, yuda engrándese i fortifiká e base di su eksistensha.

Den e kuadro aki ta tumando lugá e dianan aki na Kὸrsou un seri di kombersashon entre Politur i alto ehekutivonan di Cestur (antes Politur) di St. Domingo. E intenshon ta pa yega na akuerdonan di koperashon, partikularmente riba e area di formashon i interkambio.

Pa St. Domingo tambe, e industria di turismo ta algu di vital importansha, rason di kon e pais di merengue ke yega dentro di un periodo di 10 aña na un kantidat di 10 mion di turista anual.